Dr.Ling's Space

2008-08-27

3 days after TOEFL test

Filed under: 学习 — DrLingCN @ 22:47

  唔知唔觉,TOEFL考试就过咗3日嘞,本嚟想考完第二日就写总结嘅,结果学校要搬宿舍,拖咗两日先写~

  先讲下考试~其实我好耐以前就已经上咗新东方嘅TOEFL课,不过由于报唔上名,一直都冇得考。今次8月24号嘅考试係上年12月初报名嘅,唸返果日刷考位嘅情景,真係得人惊……

  由于之前考GRE,所以一直都冇复习TOEFL。不过,虽然GRE考衰咗,但係对考TOEFL仲係有少少帮助嘅~至少阅读里面嘅单词题,大部分都可以直接知道意思,唔需要睇原文去推理。不过阅读都唔简单,比练习用嘅Delta难出一大截……而且我比较迟入场,又加试阅读,结果做到后面嘅时候,耳边听到人哋嘅听力声音……都几无语,D人点可以开咁大声嘎,耳机嘅声都能够传过嚟……唔怕损伤听觉嘅咩……

  听力,本嚟应该係最唔惊嘅一部分,结果……平时我都已经大量睇美剧,考试前仲狂听BBC一个月。结果发现,听都能够听明白,但係细节太多,我又唔习惯记笔记,结果衰咗……最可恶嘅係D题目!竟然有好几种题型都冇出现!例如表格分类题。仲出咗Official Guide里面双选题嘅升级版!三选题!5个选项,选3个……狂考细节……

  口语总嘅嚟讲,算过得去。由于休息过程中听到早入考场嘅人讲第一题,所以有准备,10分钟休息里面默写准备好嘅口语段子。结果第一题口语,我係读嘅,应该冇乜问题~后面嘅口语仲算比较简单,要点都能够全部记录落嚟,不过最后一题,我好似记得太多,竟然讲唔完!再多5秒到10秒就好咯……应该漏咗1/5冇讲……而且我嘅语速都比较快,可能係前面冇掌握好,占用多咗几秒,搞到后面唔够时间……

  作文,算係咁啦。之前受到GRE AW嘅熏陶,搞到写乜都想两边骑墙,中庸……但係TOEFL偏偏要明确支持一面。考试果阵要努力控制自己只往一个方面唸。今次考试,我作文写得比较长。第一篇150-225字嘅作文,爆到320字。第二篇作文通常350字,我爆到490!汗……希望唔係一大杯又一大杯嘅“有毒白开水”啦~(注:“有毒白开水”此名词为广州新东方王丹丹老师上课所创,用于比喻作文嘅语言水平。有毒的白开水->白开水->一小杯咖啡->一大杯咖啡)

  等待最后嘅分数啦~

 

  再讲下前两日嘅搬宿舍。

  学校要各个学院嘅学生全部住埋一齐,搞到我哋升大四嘞,仲要换宿舍,麻烦!而且换嘅宿舍,话就话好好,好似大学城咁,但係实际上,一个字,烂!首先係地理位置唔好,去到北区嘅最北边,偏远到冇得再偏远!治安冇保障,近天河客运站,人流复杂!而且宿舍仲未搞好就搬入去!我哋升大四嘅,住最顶3层,7、8、9楼。电梯仲未装,每日上上落落,真係“锻炼身体”!宿舍里面嘅墙睇落好好,但係试试打粒钉入去,发现后面好多都係空心嘅,豆腐渣工程……

  25号,搬宿舍第一日,前面搬嘅好爽,后面搬嘅好痛苦~早上,搬宿舍,慢吞吞,而且全部嘢都係搬屋公司嘅人搬上楼嘅,D学生就舒服啦~但係下午就唔同咯~由于落雨,而且好多班都未搬完,所以学生仲要自己搬自己嘅嘢,默哀……好彩我D嘢上学期末就全部清嗮返屋企,唔使跟搬屋公司搬嗟~

 

  唔知唔觉,写咗咁多,不过之前一篇日志都係6月嘅……总结下都好……

Advertisements

2008-06-14

GRE……Canceled

Filed under: 学习 — DrLingCN @ 23:06

  GRE笔试已经过咗1个星期嘞,写篇blog嚟总结下之前2个月嘅情况啦~

  今个学期初3个星期有3个课程设计,一直冇点准备。课程设计之后开始喺屋企“半闭关”准备GRE。每个星期三晚返学校,星期四早上上完副院长嘅课就返屋企。

  由于之前报名嘅时候选咗4月28日机考作文,时间选得比较晚。基本上整个4月都喺度练习作文,一共写咗34篇Argument、16篇Issue。感觉Argument准备得就够充分嘞,但係Issue准备得唔够。所以机考作文完咗之后,出嚟嘅感觉唔係几好。

  考完作文之后,就开始准备笔试。1个月内,红宝书背咗3次,但係效果唔好。做题一D感觉都冇,而且冇办法喺30分钟内完成Verbal部分。所以嚟考试最后一个星期里面,我就已经有放弃的念头嘞。“有信心唔一定会赢,但係冇信心就一定会输。”嚟句话真係冇错嘎~

  6月7日早上,GRE笔试。当日正係高考第一日!三年前嘅6月7日,高考。三年之后,GRE。不过6月7日早上对我嚟讲的确唔係一个吉利嘅时间。三年前,高考语文,高考考得最差嘅一科。三年之后,Verbal就好似语文咁,考得一塌糊涂!

  今次GRE笔试,4个section顺序啱啱好係Verbal、Quantitative、Verbal、Quantitative。最后考嘅係Quantitative,所以做完之后仲有10分钟嘅时间。考虑咗5分钟左右吧,我就填咗cancel成绩嘅两个“蛋蛋”,再签名,取消成绩。

  两个月嘅准备,对于我呢个英语好一般嘅人嚟讲,真係唔够应付GRE嚟类嘅考试。E+先准备好8月24日嘅TOEFL iBT再讲。以后仲考唔考GRE、几时考,嚟D问题以后再讲……

2008-04-29

GRE AW部分完成

Filed under: 学习 — DrLingCN @ 12:11

  琴日考完GRE AW部分,冇感觉,比较颓废~

  中午12点半开始睇考场守着,再抄一次~

  下午1点第一个入场,3点考完。不过入去考试嘅时候比较傻,好认真睇电脑使用方法,然后做问卷调查~搞到最后几乎係最后一个考完~呵呵~

  考场路线指引比较差,而且唔按比例尺画,搞到我星期六去踩点嘅时候揾咗好耐~

  用Google地图画一个指引图啦~(左边起点係外语学院车站,右边就係专家楼(第五招待所))

2008-02-25

半年

Filed under: 学习 — DrLingCN @ 18:48
  半年,仲有半年,GRE同TOEFL都会喺嚟半年里面考完。
  嚟半年相信会比高考更紧张,希望学校嘅选修课都係真正嘅选修课啦,咁应会多D时间准备。
  4月28日,GRE机考作文;6月7日,GRE笔试;8月24日,TOEFL iBT。
  努力!

2008-02-06

迟到嘅学期总结

Filed under: 学习 — DrLingCN @ 23:22
  啱啱过去嘅一个学期,算係我入大学以嚟最唔得闲嘅一个学期。Space冇更新过,MSN有80%以上嘅时间都係离开嘅状态。但係我觉得呢个学期过得比较颓废,好似冇做几多嘢咁~
  因为呢个学期教育部搞教学评估,一开学学校就提早搞评优,我哋班同其他大四嘅接住搞保研,搞到大家都好鬼紧张。我平时基本冇参加过乜活动,德育加分几乎全班垫底,攞唔到三好,跟住就冇得保研。不过好在我目标唔係保研,冇就冇咯,冇所谓啦~就係可惜咗果D奖学金嗟~
  呢个学期嘅课好多,而且大部分都係专业课。咩鬼数字通信原理啊,数字信号处理啊,上到傻下傻下咁~考试果阵仲得人惊,本嚟2个星期7门考试就已经够嗮可怕啦,仲要放喺圣诞同元旦果两个星期!十分唔爽!后嚟发觉数字信号处理安排喺元旦放假果几日,搞到要改时间,好改唔改,改到考数字通信原理嘅第二日!嚟个back-to-back!搞到我考试前果个星期,日日去自习!粗略估计,果个星期嘅自习时间之和超过我入大学之后其他去自习嘅时间嘅总和!
  上年11月,琶洲会展中心有车展睇。本嚟得闲嘅话,可以喺媒体接待日去睇,结果成日都係课。之后干脆约埋同学周末再去。人超多~感觉八成以上嘅都係去睇车模嘅~我哋几个去得够嗮早,不过唔知道靓车喺边个馆,错过咗最少人嘅时候~3部左右嘅法拉利、3部兰博基尼、10部左右嘅保时捷……可惜都摆喺最底层果个馆环境唔多好,人好多,逼埋去都难,一般我哋逼咗入去都唔会咁快出返嚟,影够相先算~基本上,车展符合以下规律:靓车名车都冇乜必要配靓车模,靓车模旁边一般都係D唔多起眼嘅车~两部相机加一部手机,一共影咗成千张相,1G硬盘就咁畀谋杀咗~
  考完试仲有两个星期嘅课程设计,啱好我哋班冇安排,我就去准备我嘅GRE啦~本嚟可以果阵更新下个Space,但係人懒,冇计~放假之后,上咗10日嘅GRE班,早上上课,下午返屋企做作业,冇嗮空闲时间~(过完初四再上剩低嘅10日GRE)
  总算係新年前一日更新咗啦~
  希望新嘅一年里面,更加努力,向更高嘅目标前进啦~
  预祝大家新年快乐,身体健康,学业进步~

2008-01-21

正式开始放假~

Filed under: 学习 — DrLingCN @ 22:34
  一个学期冇更新Space,懒啊~
  睇睇嚟几日边日得闲,写嗮成个学期嘅事,算係一个总结啦~

2007-02-26

搞掂5000字学科导论论文!

Filed under: 学习 — DrLingCN @ 01:38
  经过大约8个钟嘅努力,终于搞掂嚟个假期嘅作业啦!
  从嚟都冇试过将作业留到假期末做,今次试试,感觉超唔爽,下次仲係要勤力D,做完作业再“堕落”先得~

2007-02-06

真係好耐都冇更新过Space啦~

Filed under: 学习 — DrLingCN @ 19:10
  睇返上次更新嘅时间,竟然係2个月之前!
  唉~讲句老实话,其实我1月考完六级果阵就想更新嘎啦,不过实在太多考试,而且放假又要上课~
 
  上年底,台湾附近海底地震,搞到中美海底光缆中断,亚太区嘅光缆都断咗几条,搞到中国同美国民用互联网连接几乎全面中断,代理都冇用,因为韩国同香港嘅国际互联网通讯都唔掂~中美光缆断咗,我先发觉,国内网对我嚟讲远远冇国外网咁有意义!冇得上国外网(主要係北美嘅网站)简直係痛苦!冇MSN,冇Hotmail,冇Google嘅日子真係难挨啊~Google唔得果阵,用咗几次Baidu,感觉Baidu真係垃圾!标榜自己中文搜索好过Google,结果搜中文出嚟嘅结果至少有一半係冇用嘅!Maybe搜搜“毛泽东思想”啊,“邓小平理论”啊,仲有D用。
  注意!google.cn唔计入Google!中国特色嘅google!过滤太多嘅嘢,即使我搜嘅嘢冇乜可以过滤,但係有过滤功能就係唔爽!Google should not be evil!
  PS:好多人会问,乜教育网可以出国嘅咩?一般係唔得嘅,不过我哋宿舍开咗教育网直通车,直接上到国外网喈~
 
  讲讲考试,今个学期考试真係唔少,必修、选修一大堆!实验都有3门!而且仲要考六级!真係痛苦!分咗3个星期先考完。
  物理实验考试係设计性实验,可以选。本嚟按照平时嘅实验,光学係最麻烦嘅,电学係最轻松嘅,我就贪轻松,选咗个电学嘅设计性实验。结果到咗考试果阵先知道,光学係最轻松嘅,调好睇到效果就可以,根本唔需要记录数据;电学係最难嘅,仪器极端烂,超级唔精确,记录数据超多,数据处理超麻烦!真係无语……
  英语考试竟然冇咗我个名!要临时係课室后面安排个座位考~真黑仔!
  马哲今次嘅题主要係本《学习指导》度出,所以脱离6x分,变咗7x分~
  专业课仲可以,不过专业课嘅实验唔小心畀阴咗下,算係个小小嘅遗憾啦~
 
  再讲讲最近睇嘅美剧。今个学期真係有好多好多美剧睇。从国内超级流行嘅Prison Break到收视率係PB两倍以上嘅后起之秀Heroes,从已经播到最后一季嘅Stargate SG-1 Season 10到佢嘅第二系列Stargate Atlantis Season 3,我都追住睇。
  感觉Prison Break到咗Season 2之后,导演开始思想混乱,再都睇唔返Season 1嘅高智商“犯罪”啦~PB其实已经唔能够再叫break啦,早早收场算啦,以免毁咗之前嘅好评啦~
  Heroes係我最近发现嘅“极端”好睇嘅美剧,第一季播放中,伊甸园同影音休闲中心两个组织嘅美剧分论坛(S-file&YYeTs)都话嚟部剧係美国收视率係之前PB嘅2倍都唔指!难怪咁贵过瘾!不过里面嘅日本人Hiro能力(时空穿梭)实在太强啦!唔削弱下真係影响平衡性!继续追最新嘅14集
  Stargate,估计冇几多国人睇过,两个系列总共已经播到13个季,一部科幻剧,1994年开始拍,每年一季,SG-1播到Season 8之后第二系列Atlantis开始,总嘅嚟讲,早年嘅比较拖剧情,新嘅就少咗D。E+ SG-1已经到咗最后一季,之后以两部电影结束嚟个系列。Atlantis就要独担大旗啦~北京时间今日早上,加拿大果边已经播咗Atlantis Season 3最后一集,down紧~
 
  唔知唔觉写作咁多~其实之前仲有好多想要写,不过E+都忘得7788啦~
  算啦,继续努力啦~假期嘅课仲未完咧~
  上完课仲有一篇5000字嘅学科导论论文要写,争取过年之前写完!!!

2006-11-26

好耐未更新过Space啦~

Filed under: 学习 — DrLingCN @ 19:05
    唉~都唔知点搞嘅,前果排D作业多到做死人!一个星期3个实验,就写预习报告都要写佢至少4、5个钟!最可怕嘅仲係电路实验!由于要申请省精品课,要求严到鬼咁,一份预习报告至少写6~8页,加上实验完嘅数据处理同结果分析,冇12页都唔冇唸住可以停笔!痛苦!痛苦!
    上个星期唔好彩,畀Norton搞到系统挂咗,搞到我用咗1日嚟重装系统,更新软件。不过好在係开学前用True Image做咗个镜像,得以咁快速回复系统到perfect嘅状态~如果冇咗佢,估计要3、4日先得~或者要启用第二只硬盘嘅应急备用系统~
    前路茫茫~今晚仲要搞掂篇马哲论文!一个星期之后开始为期2个星期嘅金工实习,原本以为可以轻松下,冇作业,可以好好准备考六级,谁知个辅导员讲,晚刻嘅课全部照常上!靠!所有嘅时间都冇晒!都唔知点算~六级啊~~~

2006-10-02

九月回顾

Filed under: 学习 — DrLingCN @ 22:08
    好神奇,我竟然一个多月冇更新过Space!唉~可能係嚟个月太忙同埋唔能够用教育网直接上Space嘅缘故啦~
    九月係一个新学年嘅开始,自然有好多好多嘢要去做。新学年,我哋从大学城嘅靓靓宿舍搬咗返去本部嘅超烂宿舍,住宿环境劲差!仲要收费贵死咁高!以前嘅靓宿舍先1500一年,E+嘅烂宿舍竟然仲要1200!差300蚊竟然待遇差咁鬼死多!抢钱咩!
    搬咗返本部仲有一个唔好嘅地方就係我想返屋企嘅话,更困难嘞!唔冇以为本部係市区里面嚟屋企近咗就可以更快返到屋企。其实,係大学城,我可以直接坐地铁返到屋企,无论係唔係上落班时间,1个钟之内绝对搞掂;E+我只能够坐公共汽车,而且冇得直达,要转车,次次坐车返屋企都要係天河塞佢10分钟,非上落班时间仲好1个钟头多15分钟就可以返到屋企,不过如果碰到上落班时间嘅话,2个钟都未必得!痛苦啊~重温5、6年前嘅逼车经历~
    当然,新学期唔可以唔提提校园网嘅事啦!由于我哋搬咗宿舍,又要重新申请一次开网。不过由于已经升上大二,学院就唔会百般刁难你、唔俾你开网啦~不过网络中心超变态!竟然要收150蚊嘅开网费!!!以前係大学城用全新嘅设备都冇D咁嘅“抢钱”名目,只要28蚊/月嘅网费;E+竟然要用烂到几乎唔能够用嘅网线,仲要收150嘅网络初装费,30蚊/月嘅网费,抢钱程度真係俾电信仲狼!撇开以上唔讲,你既然收咗150蚊,就应该将个网搞得好D啦,但係同宿舍传输嘅速度只有以前係大学城果阵嘅一半!最激气嘅係,开学一个月就已经烧咗2部交换机,2次长时间断网,1次间歇性断网!栋宿舍嘅网管又超废,乜都做唔到,只识收网费!第一次断网係我苦等6个钟未见到网管有任何动静嘅情况下,打电话到华南地区教育网服务中心投诉,30分钟后解决;第二次係我交同学打同一个电话投诉,本嚟又可以快速解决嘅,但係个网管竟然话佢唔记得去攞新交换机,搞到3日之后先重新通网!唉~华工嘅校园网就係烂,网烂,网管更烂!
    讲咗咁多唔顺心嘅事,讲返D开心嘅事啦~新学期一开始,惯例性嘅就要评上学期嘅综合排名,经过3日3夜嘅评分,终于我都有返一个三好学生+三等奖学金,数额都算唔少嘎啦,1500蚊,够吃几餐嘎啦~
    大学英语四级顺利通过,向六级前进!争取攞个CET-SET 6证书!
    返咗北校区,终于可以选选修课。我一次性就选咗2科(一个学期最多选2科,多咗就全部选到嘅都作废!),竟然係报名人数超出上课人数100几嘅情况下,冇俾筛选出去!真係幸运!
    新一个学年,要争取更好嘅成绩,为以后嘅“大计”做好充分嘅准备!
    根据教育网总中心嘅文件,微软大部分站点被列为免费站点,所有只能浏览国内网站嘅学生都可以免费直接连微软属下嘅大部分网站,所以E+我可以直接上Windows Live Messenger(以前嘅MSN)啦!大家多多上啦~我几乎都挂係上面啦~不过可惜Live Spaces有部分IP冇放入免费列表,暂时唔能够上。
 
PS:为咗“十·一”长假唔带作业返屋企,我竟然係学校通宵咗一晚将所有作业全部完成!真係有D佩服自己。
下一页 »

在WordPress.com的博客.

%d 博主赞过: